Dastlab tadbir ishtirokchilari viloyat Xotin-qizlar tadbirkorlik markazida kasb-hunarga o‘qitish jarayonlari bilan yaqindan tanishib, markazda kasb o‘rganayotgan xotin-qizlar bilan muloqot qildi.

Shuningdek, Ayollarni reabilitatsiya qilish va moslashuv markazi faoliyati, bu yerda yaratilgan sharoitlar bilan tanishdi.

Matbuot anjumanida viloyat hokimi o‘rinbosari, Oila va xotin-qizlar boshqarmasi boshlig‘i Nargiza Tojiboyevaning hisoboti tinglandi.

– Xotin-qizlar ayollar tadbirkorligini qo‘llab-quvvatlash bo‘yicha olib borilayotgan saʼy-harakatlar opa-singillarimizning ijtimoiy faolligini oshirishga, turmush farovonligini yuksaltirishga imkon yaratmoqda, – deydi viloyat hokimi o‘rinbosari N.Tojiboyeva. – Sirdaryo viloyati xotin-qizlar tadbirkorlik markazi tomonidan tuman-shaharlarda tadbirkorlik qilish istagi bo‘lgan 10 234 nafar xotin-qiz kasb-hunarga o‘qitilib, 5 562 nafariga imtiyozli kredit ajratildi. Joriy yilda 6641 nafar xotin-qiz tadbirkor sifatida davlat ro‘yxatidan o‘tib, ular tomonidan 11 979 ta yangi ish o‘rni yaratildi.

Matbuot anjumanida OAV vakillarini qiziqtirgan savollarga batafsil javoblar berildi.