"Konstitutsiya ko‘chasi"

O‘zbekiston Respublikasi Konstitutsiyasi qabul qilinganining 32 yillik bayrami munosabati bilan Sirdaryo viloyat adliya boshqarmasi tomonidan Guliston shahridagi "Bilimdonlar maskani"da "Konstitutsiya – erkin va farovon hayot garovi!” shiori ostida “Konstitutsiya ko‘chasi” tashkil etilib, unda huquqiy demokratik davlat va erkin fuqarolik jamiyatining asosi bo‘lgan O‘zbekiston Respublikasi Konstitutsiyasi, uning mazmun -mohiyati targ‘ib qilinib, turli ko‘rgazmali vositalar orqali namoyish qilindi.

"Konstitutsiya ko‘chasi"da adliya hamda boshqa huquqni muhofaza qiluvchi organlar tomonidan huquqiy maslahat burchaklari tashkil qilinib, aholi va yoshlarga huquqiy va davlat xizmatlari ko‘rsatildi.

Sirdaryo viloyati yuridik texnikumi o‘quvchilari tomonidan esa chellenjlar, yoshlarning Konstitutsiyaga doir bilimlarini sinovdan o‘tkazish bo‘yicha viktorina, “Huquqiy zakovat” intellektual o‘yinlari tashkil etildi.

– Bugun o‘tkazilgan tadbir davomida Konstitutsiya targ‘ibotiga alohida urg‘u berdik. Aholining, ayniqsa, yoshlarning faolligi, ularning yurtimizda amalga oshirilayotgan islohotlarga befarq emasligi bizda katta taassurot qoldirdi. Shu kabi tadbirlar nafaqat Guliston shahrida, viloyatning boshqa hududlarida ham o‘tkazilib, unda adliya va huquq- tartibot idoralari xodimlari faol ishtirok etdi,– deydi Sirdaryo viloyat adliya boshqarmasi huquqiy axborot shuʼbasi bosh maslahatchisi Dilnoz Umurzoqova.