«Йил аёли» миллий танловининг вилоят босқичида иштирок этган 37 нафар аёлнинг барчаси иқтидор, маҳорат, кенг дунёқараш ва ижтимоий фаоллик жиҳатидан ҳакамлар ҳайъатида катта таассурот қолдирди. Қатнашчилар 3 шарт бўйича ўзаро баҳслашди​.

Очилиш маросимида вилоят ҳокими иштирок этди. Акмалжон Махмудалиев танлов қатнашчиларига омад тилар экан, хотин-қизларнинг оиладаги, жамиятдаги ўрни хусусида тўхталиб ўтди. Уларга қаратилаётган эътибор ва яратилаётган имкониятлар натижасида аёллар эришаётган ютуқлар эътироф этилди.

Якуний натижага кўра, Ширин шаҳридаги "Сирдарё ИЭС" АЖ лаборанти Дилфуза Рузикулова 1-ўринни, Гулистон шаҳридаги олимпия ва паралимпия маркази мураббийси Лобаргул Мирзаходжаева 2-ўринни, Сирдарё туманида истиқомат қилувчи, уй бекаси Шоира Алимухамедова 3-ўринни эгаллади. Шунингдек, 11 нафар фаол иштирокчи белгиланган номинациялар бўйича совриндор бўлди.

Бундан ташқари, «Гендер тенглик фаоли» миллий танловининг ғолиблари ҳам аниқланди.

«Гендер тенгликни таъминлашда энг фаол давлат органи» — Гулистон шаҳар АТ Халқ банки;

«Гендер тенгликни таъминлашда энг фаол ҳокимлик» — Сардоба тумани ҳокимлиги;

«Гендер тенгликни таъминлашда энг фаол ташкилот» — “Нурли маскан” мактаб-интернати;

«Гендер тенгликни таъминлашда энг фаол ННТ» — Гулистон шаҳридаги “Academy of psyxology” МЧЖ;

«Гендер тенгликни таъминлашда энг фаол тадбиркорлик субъекти» — Мирзаобод туманидаги “Guliston Golden Yarn” МЧЖ;

«Гендер тенгликни тарғиб қилишга қаратилган энг яхши Тв дастур» — “Ўзбекистон” телеканалининг Сирдарё вилояти бўйича ўз мухбири Ишонхонов Азизхон Алиханович;

«Гендер тенгликни тарғиб қилишга қаратилган интернетдаги энг яхши веб-сайт» — Ховос тумани ҳокимлиги сайти.