Вилоят ҳокими вазифасини бажарувчи Акмалжон Махмудалиев Янгиер шаҳридаги қатор корхоналар фаолияти билан танишди

"Sulpak komputers" МЧЖ 2020 йилнинг апрель ойида иш бошлаган. Акмалжон Махмудалиев унинг иш жараёнини, маҳсулотларини кўздан кечирди. Қиймати 3,5 млн АҚШ доллари бўлган корхона ёғочдан шпон, фанер, плита ва панеллар, акрил, МДФ ва ламинат ишлаб чиқаради.

Иқтисодий зонадаги яна бир корхона - "Inter trading group" масъулияти чекланган жамиятида йилига 74 минг тонна ун тайёрланади. Бу ерда корхонанинг ишлаб чиқариш технологияси билан танишилди.

"Euratsian industrial union" корхонаси ҳам кўздан кечирилди. Мазкур корхонада йилига 90 минг қути пенополистирол плинтуслар ишлаб чиқарилмоқда.

Сув ўтказмайдиган доска чиқарадиган "Eco vood plyus" корхонасида эса 60 киши меҳнат қилмоқда. Йиллик экспорт ҳажми эса 7,5 млн АҚШ долларини ташкил этади. Вилоят ҳокими корхоналарда маҳаллийлаштириш даражасини ошириб, импорт ўрнини босувчи ва экспортбоп маҳсулотлар ишлаб чиқариш янада кенгайтириш юзасидан кўрсатмалар берди.