Муҳтарам Президентимиз раислигида 2 ноябрь куни ўтказилган видеоселектор йиғилишида аҳолини уй-жой билан таъминлаш ҳамда яшил майдонларни кенгайтириш масалалари муҳокама қилиниб, республиканинг ҳар бир ҳудудида “Янги Ўзбекистон” массивлари бунёд этиш бўйича аниқ кўрсатма ва топшириқлар берилган эди.

^{Гулистон туманининг "Деҳқонобод" МФЙ ҳудудида қурилиши режалаштирилаётган "Янги Ўзбекистон" массиви лойиҳаси}

Сирдарё вилоятининг 4 та ҳудуди – Гулистон, Янгиер шаҳарлари ҳамда Сирдарё, Гулистон туманларида “Янги Ўзбекистон” массивлари барпо этилиши белгиланган. Мазкур массивларнинг бош режасига асосан жами 234 та 5 ва 7 қаватли 8 508 хонадонли турар жойлар қурилади. Бунинг натижасида 10 мингга яқин оила уй-жой билан таъминланади.

^{Гулистон шаҳрининг "Янги ҳаёт" МФЙ ҳудудида қурилиши режалаштирилаётган "Янги Ўзбекистон" массиви лойиҳаси}

Массивлар ҳудудида 27 км ички йўллар, 32 км оқава сув тармоғи, 26 км ичимлик суви, 25 км табиий газ, 30 км электр тармоқлари ўтказилади. 1400 ўринга эга бўлган 4 та мактаб, 5 та 1500 ўринга мўлжалланган болалар боғчаси, 3 та поликлиника қад ростлайди. Бундан ташқари 8 та Ёшлар меҳнат гузари, 3 та IT-парк, 3 та “Коворкинг маркази”, 30 та савдо дўконлари, 1000 ўринга мўлжалланган 4 та тикувчилик ҳамда 6 та нон ва нон маҳсулотлари ишлаб чиқариш цехлари қурилади.

^{Янгиер шаҳрининг "А.Жомий" МФЙ ҳудудида қурилиши режалаштирилаётган "Янги Ўзбекистон" массиви лойиҳаси}

Бугунги кунда ҳудудларда ер майдонлари ажратилган. Қурилиш лойиҳаларининг бош режалари ишлаб чиқилиб, қурилиш штаблари ташкил этилди.

Мазкур турар-жойларнинг таннархини камайтириш учун кўп тармоқли қурилиш корхоналар томонидан зарур материалларнинг ишлаб чиқарилиши, замонавий энергия тежамкор қурилиш материалларининг қўлланилиши натижасида, уй-жойларнинг 1 кв.м қурилиш майдони 4,5 млн.сўмни ташкил этиши кўзда тутилган.