Жаҳон соғлиқни сақлаш ташкилоти экспертлари

Жаҳон соғлиқни сақлаш ташкилоти экспертлари – Сирдарёда

Ўзбекистонда илк бора давлат тиббий суғурта тизими билан боғлиқ тажриба синов ишлари жорий йилнинг 1 июнидан Сирдарёда бошланган.

Аҳолига кўрсатилаётган тиббий хизмат сифатини ошириш мақсадида вилоят кўп тармоқли тиббиёт маркази ўрнида Гулистон тиббиёт кластерини ташкил этиш, уни ишга тушириш чоралари кўрилмоқда.
Мазкур ишларнинг бориши, соҳада мураккаб ва юқори технологик амалиётлар қандай жорий этилаётгани билан танишиш мақсадида Сирдарёга Жаҳон соғлиқни сақлаш ташкилоти экспертлари ҳамда давлат тиббий суғурта жамғармаси вакиллари ташриф буюрди.

Дастлаб, улар Республика шошилинч тиббий ёрдам илмий маркази Сирдарё вилоят филиалида бўлиб, марказ имкониятлари билан танишди.

Болалар жарроҳлик ва жароҳатлар бўлими, Катталар анестезиология-реаниматология бўлими, кардиотерапевтик реанимация бўлими, токсикология ва экстракорпорал тозалаш бўлимларида бўлиб, бу ерда беморларнинг даволаниши учун яратилган шарт-шароитларни кўздан кечирди. Соҳа мутахассисларига ўзларининг муҳим тавсияларини берди.