Муносибларга давлат мукофотлари топширилди

Вилоят ҳокимлиги "Қабуллар уйи"да 22 март – Маҳалла тизими ходимлари куни муносабати билан соҳанинг бир қатор фаолларини тақдирлаш маросими бўлиб ўтди.

Унда сўз олганлар йиғилганларни юртимизда кенг нишонланаётган Наврўз байрами ҳамда Маҳалла тизими ходимлари куни билан самимий табриклаб, уларга шарафли ва масъулиятли фаолиятларида куч-ғайрат ва муваффақиятлар тиладилар.

Давлатимиз раҳбарининг бугун имзоланган фармони билан юксак давлат мукофотларига лойиқ кўрилган, Боёвут тумани Навбаҳор МФЙ раиси Жумабой Раҳмонқуловга “Дўстлик” ордени ҳамда Мирзаобод тумани Деҳқонобод МФЙ “Оқила аёллар ҳаракати” аъзоси Махбуба Исмоиловага “Жасорат” медали тантанали топширилди.

Тадбирда, шунингдек, маҳалла тизимида самарали меҳнат қилиб, соҳа ривожига муносиб ҳисса қўшиб келаётган 11 нафар фаоллар “Маҳалла ифтихори” кўкрак нишон ва қимматбаҳо совғалар билан мукофотландилар.