Yoshlar harbiy-o‘quv yig‘in mashg‘ulotlarida toblandi

“Jasorat maktabi” harbiy-o‘quv yig‘inining joriy mavsumiga ham 100 nafar yoshlar jalb qilindi. Ularni vatanparvarlik ruhida tarbiyalash, kasb-hunarga o‘rgatish, bandligini taʼminlash hamda yurtimiz kelajagi uchun daxldorlik hisini uyg‘otish maqsadida 10 kun davomida tonggi badantarbiya, seminarlar, jangovar va saf tayyorgarligi, sport musobaqalari va yana qator o‘quv mashg‘ulotlari o‘tkazildi.

Yoshlarning 3 nafariga tadbirkorlik faoliyatini boshlash uchun imtiyozli kredit ajratish, 8 nafarini IT sohasiga, 73 nafarini o‘zlari qiziqqan kasb-hunarga o‘rgatib, ishga joylashtirish va yana 16 nafarini haydovchilikka o‘qitish belgilab olindi. Shuningdek, safarbarlik chaqiruv rezervida xizmat qilish istagini bildirgan 49 nafar yoshning shartnoma to‘lovlari “Yoshlar jamg‘armasi” mablag‘lari hisobidan qoplab beriladigan bo‘ldi.

Yig‘in dasturiga asosan bugun sektor rahbarlari va yoshlar uchrashuvi ham tashkil etildi. Unda so‘z olgan viloyat hokimi, harbiy-maʼmuriy sektor rahbari Akmaljon Maxmudaliyev yoshlarning bu yerda olingan bilim va ko‘nikmalari hayot maktabi vazifasini o‘tashiga ishonch bildirdi.

Ishtirokchilarga maxsus sertifikatlar tantanali ravishda topshirildi. Vatanni ulug‘lovchi ajoyib kuy-qo‘shiqlar samimiy va do‘stona ruhda davom etgan uchrashuvga yana-da tantanavorlik baxsh etdi.