Сув хўжалиги вазири Ш.Хамраев 12–13 август кунлари Сирдарё вилоятида бўлиб, бу борада олиб борилаётган ишлар билан ҳам танишди. Жумладан, Сирдарё туманида Ўзбекистон-Хитой қўшма корхонаси шаклидаги МЧЖ тасарруфидаги дала майдонларида ўтказилган “Қишлоқ хўжалиги йўналишида бугунги кунда суғориш тизимидаги томчилатиб суғориш усулининг афзалликлари” мавзуидаги кўргазмали семинарда қатнашди. Тадбирда Қуйи Сирдарё ирригация тизимлари ҳавза бошқармасининг масъул ходимлари, туман ирригация бўлимлари ва сув истеъмолчилари уюшмалари раҳбарлари, фермерлар, мутахассислар иштирок этди.

Семинарда Сув хўжалиги вазири юртимизда Президентимиз ташаббуси билан олиб борилаётган ислоҳотлар, бунёдкорлик ишлари ҳамда янги инвестиция лойиҳаларини сув хўжалигида кенг татбиқ этиш ҳақида сўз юритди. Сувчилар ва фермерларга сув олишни тартибга солиш, обиҳаётни тежаб ишлатиш, томчилатиб ва ёмғирлатиб суғориш жорий этилган майдонларни кенгайтириш бугунги куннинг талаби эканлигини, вазирлик бу борада уларга ҳар бир масалада амалий ёрдам беришга тайёр эканлигини таъкидлади.

Сув хўжалиги вазири Ховос туманидаги Улуғбек Йўлдошев раҳбарлик қилаётган “Сайхун” фермер хўжалигининг пахта даласида ҳам бўлиб, ховослик фермерлар билан суҳбатлашди. Улуғбек Йўлдошев вилоятда биринчилардан бўлиб, сув тежовчи технологияларни ўз экин майдонига ўрнатган изланувчан тадбиркор фермер. Икки йилдан буён У.Йўлдошев ғўза суғоришни қўл телефони орқали кўпчилик фермерларнинг қизиқишини уйғотди. Вазир фермер хўжалигининг фаолияти билан яқиндан танишар экан, ўз тавсияларини берди:

– Ҳозирги кунда юртимизда 36 та йирик, 56 та кичик корхона сув насослари ва уларнинг эҳтиёт қисмларини ишлаб чиқармоқда. Сиз Германияда ишлаб чиқарилган насослардан фойдаланаётган экансиз. Хориж насослари жуда қиммат. Ўзимизда ишлаб чиқарилаётганлари ҳам хорижникидан кам эмас, бундан буёғига маҳаллий корхоналарда тайёрланган насослардан фойдаланинг. Бу ҳам қулай, ҳам арзонга тушади.