Сирдарё вилоят мусиқали драма театрида Ўзбекистон Журналистлар уюшмаси аъзоси, адиба Сабоҳат Норбўтаеванинг мазкур театрида узоқ йиллар давомида фаолият кўрсатган, ўзидан яхши хотиротлар қолдирган, марҳум актёр, Ўзбекистонда хизмат кўрсатган артист Адҳам Абдуллаев ҳақидаги "Машъалага айланган юрак ёки Адҳам Абдуллаевни хотирлаб" ҳамда вилоят ва республикамиз қатор театрларида фаолият юритган таниқли актёрлар ҳаёти ҳақида ҳикоя қилгувчи "Саҳна "мажнун"лари" китобларининг тақдимоти ўтказилди.

Китоблар тақдимотида марҳум актёр  Адҳам Абдуллаевнинг оила аъзолари,  яқинлари,  шогирдлари,  театр ва санъат намояндалари,  ижодкорлар ва ижодкорнинг мухлислари иштирок этди. Ўзбекистон давлат санъат ва маданият институти рофессори Маъмиржон Умаров, Ўзбекистонда хизмат кўрсатган журналист Алиқул Хонимқулов, Гулистон давлат университети профессори  Равшанбек Маҳмудов, “Университет овози” газетасининг бош муҳаррири Мунаввар Пардаевлар Адҳам Абдуллаевнинг актёрлик маҳорати, одамийлик хислатлари ҳақида сўз юритишди.  

Тақдимотда Адҳам Абдуллаев роль ўйнаган саҳна асарларидан намойиш қилинган видео парчалар, театр актёрлари ва хонандалар томонидан  турли спектакллар асосида ижро қилинган   қўшиқ ва яллалар иштирокчиларнинг олқишларига сазовор бўлди.