Кўмакка муҳтож оилаларнинг 33 нафар фарзандига суннат тўйи қилиб берилди

Мустақиллик байрами арафасида вилоятимиз бўйлаб инсон қадрини улуғлашга қаратилган хайрли тадбирлар кенг қулоч ёзмоқда. Хусусан, бугун ижтимоий ҳимояга муҳтож, «Темир дафтар» ва «Аёллар дафтари» га киритилган оилаларнинг 33 нафар фарзандига суннат тўй қилиб берилди.

Хайрли тадбирда сўзга чиққан вилоят ҳокими Акмалжон Махмудалиев келажагимиз эгаларига эътибор Президентимиз раҳбарлигида мамлакатимизда олиб борилаётган ислоҳотларда асосий ўрин тутаётганини таъкидлади. Тўйлари ўтказилаётган болажонлар орасидан келгусида ватанимиз учун манфаат келтирадиган етук инсонлар етишиб чиқишига ишонч билдирди.

Ўзбекистон маҳаллалари уюшмаси томонидан ўтказилган «Мустақиллигимизнинг 33 йиллигига 33 та лойиҳа» танловида ғолибликни қўлга киритган маҳаллаларга махсус сертификатлар топширилди.

Шундан сўнг тўй болаларнинг ҳар бирига давлат идоралари ва ҳомийлар томонидан тайёрланган бош-оёқ сарпо ҳамда велосипедлар совға қилинди.

Айниқса, эртак қаҳрамонлари иштирокидаги театрлаштирилган томошалар, маданият ходимларининг мусиқий чиқишлари болажонлар ва уларнинг ота-оналарига бир олам қувонч улашиб, тадбирга янада кўтаринкилик бағишлади.