Boks bo‘yicha O‘zbekiston kubogi

Joriy yilning 6-12-noyabr kunlari Guliston shahridagi “Alpomish” sport majmuasida sportning boks turi bo‘yicha o‘smirlar o‘rtasida O‘zbekiston kubogi musobaqasi o‘tkazildi.

Sirdaryo viloyati sport boshqarmasi tashabbusi bilan tashkil etilgan va Sirdaryo viloyati mezbonlik qilgan boks musobaqasida Qoraqalpog‘iston Respublikasi, viloyatlar va Toshkent shahridan hamda Bahodir Jalolov boks maktabidan jami 400 nafarga yaqin yosh sportchi qatnashib, ular 15 ta vazn toifasida kuch sinashdi.

Natijaga ko‘ra, Toshkent viloyati jamoasi 1-o‘rinni, Respublika Olimpiya va Paralimpiya sport turlariga tayyorlash markazi jamoasi 2-o‘rinni, Toshkent shahri vakillari 3-o‘rinni qo‘lga kiritib, boks musobaqasida kuchliligini namoyon etishdi.

Taqdirlash marosimida Sirdaryo viloyati hokimi Akmaljon Maxmudaliyev so‘zga chiqib, barcha sovrindor sportchilarni g‘oliblik va musobaqadagi munosib ishtiroki bilan tabrikladi.

Shuningdek, taqdirlash marosimi davomida O‘zbekiston boks federatsiyasi bosh kotibi Mirshohid Tillaboyev, O‘zbekiston boks terma jamoasi bosh murabbiyi To‘lqin Qilichev, terma jamoa murabbiyi kubalik Xulio Li Echavarria, O‘zbekiston o‘smirlar terma jamoasi bosh murabbiyi Sirojiddin Naimovlarga esdalik sovg‘alari topshirildi.