Sirdaryo viloyat musiqali drama teatrida O‘zbekiston Jurnalistlar uyushmasi aʼzosi, adiba Sabohat Norbo‘tayevaning mazkur teatrida uzoq yillar davomida faoliyat ko‘rsatgan, o‘zidan yaxshi xotirotlar qoldirgan, marhum aktyor, O‘zbekistonda xizmat ko‘rsatgan artist Adham Abdullayev haqidagi "Mashʼalaga aylangan yurak yoki Adham Abdullayevni xotirlab" hamda viloyat va respublikamiz qator teatrlarida faoliyat yuritgan taniqli aktyorlar hayoti haqida hikoya qilguvchi "Sahna “majnun”lari" kitoblarining taqdimoti o‘tkazildi.

Kitoblar taqdimotida marhum aktyor  Adham Abdullayevning oila aʼzolari, yaqinlari, shogirdlari, teatr va sanʼat namoyandalari, ijodkorlar va ijodkorning muxlislari ishtirok etdi. O‘zbekiston davlat sanʼat va madaniyat instituti rofessori Maʼmirjon Umarov, O‘zbekistonda xizmat ko‘rsatgan jurnalist Aliqul Xonimqulov, Guliston davlat universiteti professori  Ravshanbek Mahmudov, “Universitet ovozi” gazetasining bosh muharriri Munavvar Pardayevlar Adham Abdullayevning aktyorlik mahorati, odamiylik xislatlari haqida so‘z yuritishdi.  

Taqdimotda Adham Abdullayev rol o‘ynagan sahna asarlaridan namoyish qilingan video parchalar, teatr aktyorlari va xonandalar tomonidan  turli spektakllar asosida ijro qilingan   qo‘shiq va yallalar ishtirokchilarning olqishlariga sazovor bo‘ldi.