Xalq deputatlari Mirzaobod tumani Kengashining navbatdan tashqari sessiyasida tumanga yangi hokim tayinlandi.

Sessiyada viloyat hokimi Akmaljon Maxmudaliyev kun tartibidagi masala yuzasidan qilgan maʼruzasida hududni ijtimoiy-iqtisodiy rivojlantirish borasida yo‘l qo‘yilgan xato va kamchiliklarni sohalar bo‘yicha birma-bir tanqidiy tahlil qildi.

Shundan so‘ng deputatlar uning Sarvar Sultonovni Mirzaobod tumani hokimi lavozimidan ozod etish to‘g‘risidagi taklifini maʼqulladi.

Viloyat rahbari tuman hokimi lavozimiga tavsiya etilgan nomzod — Raxmonkulov Orif Xudoyberdiyevichni tanishtirdi.

Muzokarada so‘zga chiqqanlar yangi hokim atrofida jipslashib, hududni rivojlantirish, obod qilish, aholi turmush farovonligini yana-da oshirishga hissa qo‘shishlarini taʼkidladilar.

Viloyat hokimining Orif Raxmonkulovni Mirzaobod tumani hokimi etib tayinlash to‘g‘risidagi qarori deputatlar tomonidan bir ovozdan tasdiqlandi.

Orif Raxmonkulov 1983-yilda Jizzax viloyati Baxmal tumanida tug‘ilgan. 2010-yilda Toshkent moliya institutini bakalavr darajasini, 2012-yilda magistraturani tamomlagan. Maʼlumoti bo‘yicha mutaxassisligi — buxgalteriya hisobi va audit.

Mehnat faoliyati davomida bank sohasida turli vazifalarda faoliyat olib borgan. Mazkur tayinlovga qadar “Ipoteka-bank” aksiyadorlik tijorat banki Sirdaryo viloyati filiali boshqaruvchisi lavozimida ishlab kelayotgan edi.