Ko‘makka muhtoj oilalarning 33 nafar farzandiga sunnat to‘yi qilib berildi

Mustaqillik bayrami arafasida viloyatimiz bo‘ylab inson qadrini ulug‘lashga qaratilgan xayrli tadbirlar keng quloch yozmoqda. Xususan, bugun ijtimoiy himoyaga muhtoj, «Temir daftar» va «Ayollar daftari» ga kiritilgan oilalarning 33 nafar farzandiga sunnat to‘y qilib berildi.

Xayrli tadbirda so‘zga chiqqan viloyat hokimi Akmaljon Maxmudaliyev kelajagimiz egalariga eʼtibor Prezidentimiz rahbarligida mamlakatimizda olib borilayotgan islohotlarda asosiy o‘rin tutayotganini taʼkidladi. To‘ylari o‘tkazilayotgan bolajonlar orasidan kelgusida vatanimiz uchun manfaat keltiradigan yetuk insonlar yetishib chiqishiga ishonch bildirdi.

O‘zbekiston mahallalari uyushmasi tomonidan o‘tkazilgan «Mustaqilligimizning 33 yilligiga 33 ta loyiha» tanlovida g‘oliblikni qo‘lga kiritgan mahallalarga maxsus sertifikatlar topshirildi.

Shundan so‘ng to‘y bolalarning har biriga davlat idoralari va homiylar tomonidan tayyorlangan bosh-oyoq sarpo hamda velosipedlar sovg‘a qilindi.

Ayniqsa, ertak qahramonlari ishtirokidagi teatrlashtirilgan tomoshalar, madaniyat xodimlarining musiqiy chiqishlari bolajonlar va ularning ota-onalariga bir olam quvonch ulashib, tadbirga yana-da ko‘tarinkilik bag‘ishladi.