Transperensy international tashkilotining 2023-yilgi korrupsiyani qabul qilish indeksiga ko‘ra, 180 ta davlat orasida O‘zbekiston 33 ball bilan 121-o‘rinni egalladi. Mamlakat ballarini 2 taga oshirib, o‘rnini 5 pog‘onaga yaxshilashga muvaffaq bo‘lgan.

Darhaqiqat, mamlakatimizda korrupsiyaga qarshi kurashish va uning oldini olish bilan bog‘liq huquqiy mexanizmlar takomillashtirilib, bir qator muhim normativ-huquqiy hujjatlar qabul kilinmoqda. O‘zbekiston Respublikasining «Manfaatlar to‘qnashuvi to‘g‘risida»gi qonuni huquqni qo‘llash amaliyotida manfaatlar to‘qnashuvining oldini olish va tartibga solish maqsadiga qaratilgani bilan ahamiyatlidir.

Viloyat hokimligida tuman shahar hokimlari va hokim o‘rinbosarlari ishtirokida tashkil etilgan seminarda mazkur qonun mazmun-mohiyati xususida so‘z bordi. 

Tadbirda Adliya vaziri o‘rinbosari Xudoyor Meliyev tomonidan ushbu qonunning maqsadi va amal qilish sohasi, manfaatlar to‘qnashuvi bilan bog‘liq munosabatlarni davlat tomonidan tartibga solish, manfaatlar to‘qnashuvi to‘g‘risidagi axborotni oshkor etishga va manfaatlar to‘qnashuvini aniqlashga doir choralar haqida batafsil tushuntirildi.

Shuningdek, muloqotda korrupsiyaga oid islohotlarni birdek taʼminlanishiga barcha birdek masʼul ekani taʼkidlanib, manfaatlar to‘qnashuvi to‘g‘risida xabar bermaganlik uchun belgilangan jazo choralari haqida to‘xtalib o‘tildi.

Tadbirda korrupsiyaviy xavf-xatarlarni bartaraf etish mexanizmlarini yana-da takomillashtirish, hududda sodir etilgan korrupsion holatlarni hududiy kengashlar yig‘ilishlarida muntazam muhokama qilib borish, reyting natijalarini yaxshilash bo‘yicha masʼullarga tegishli taklif va tavsiyalar berildi. Manfaatlar to‘qnashuviga yo‘l qo‘ymaslik va uning oqibatlari tushuntirilib, ogohlantirildi.