Вилоят раҳбари Ширин шаҳрида бўлди

Эркинжон Турдимовнинг аҳоли яшаш шароитлари ҳамда ҳудудларда амалга оширилаётган ислоҳотларнинг бориши билан танишувининг навбатдаги манзили Ширин шаҳри бўлди.

Дастлаб, шаҳарнинг Ватанпарвар маҳалласида жойлашган ҳарбий қисмларда хизматчилар учун яратилган шароитлар билан танишди.

Шунингдек, ҳудудда жойлашган Сирдарё иссиқлик электр станциясида бўлиб, маҳаллийлаштириш дастури доирасида амалга оширилаётган ишларни кўриб чиқди.

Корхона раҳбарияти томонидан 2024 йилда маҳаллийлаштириш дастури режаси 223 фоизга бажарилиб, 2,6 миллиард сўмдан ортиқ маҳсулотлар ишлаб чиқарилганлиги билдирилди. Ҳозирда тизим корхоналари учун яна 16 та маҳсулот тури бўйича 2,4 миллиард сўмлик маҳаллийлаштириш йўналишидаги ишлар олиб борилаётганлиги маълум қилинди.

Эҳтиёт қисмларнинг сифат даражаси ҳамда иш самарадорлигини ошириш борасида қатор маслаҳатлар берилди.