Қувайтлик инвесторлар Боёвутда

Боёвут туманида 4 та йирик ишлаб чиқариш корхонаси бўлиб, шундан “Golden Osiyo Center Co” МЧЖда дон маҳсулотлари қайта ишланиб, ун маҳсулотлари 100 фоиз хорижий давлатларга экспорт қилинса, "Boyovut Cotton Textile" ҳамда “Boyovut techno Cluster” корхоналарида пахта хомашёсидан ип- калава, "STELLA MODA" корхонасида кийим-кечак ишлаб чиқарилиб, ушбу маҳсулотларнинг 70 фоизи хорижий давлатларга жўнатилади.

Яқин вақтларда улар сони яна ҳам ошиши мумкин. Бу эса ишлаб чиқарилаётган маҳсулотлар турининг кўпайишига, хизмат кўрсатиш кўламининг кенгайишига, энг муҳими, туманнинг экспорт салоҳияти ортишига, аҳолининг ишсиз қатламини иш билан таъминлашга ҳисса қўшиши мумкин.

Боёвут туманига Ўзбекистоннинг Қувайтдаги Фавқулодда ва мухтор элчиси Аюбҳон Юнусов ҳамроҳлигида қувайтлик инвесторлар ташриф буюрди.

Улар туманнинг иқтисодий-ижтимоий имконияти билан яқиндан танишди. Шу билан бирга туман марказида кўп қаватли уйлар қуриш, хизмат кўрсатиш марказлари барпо этиш, тиббий лаборатория ташкил этиш, экотуризм корхоналарини очиш ҳамда қишлоқ хўжалиги маҳсулотларини етиштириш бўйича ҳамкорлик қилиш лойиҳаларини муҳокама этишди.

Туман ҳокими Дилфуза Ўролова хорижлик инвесторлар билан истиқболли лойиҳаларни рўёбга чиқариш икки томон учун ҳам фойдали бўлишини қайд этиб, мутасаддиларга компаниялар мутахассислари билан лойиҳаларни амалга оширишнинг техник -иқтисодий томонларини ишлаб чиқиш юзасидан тегишли кўрсатмалар берди. Шунингдек, икки томон расмийларининг кенг доирадаги мулоқотлари, маҳаллий тадбиркорлар билан "Б2Б" форматидаги учрашувлар ташкил этилди.

Учрашувдан сўнг сармоядорлар ҳудудларга чиқиб, туманнинг имкониятлари билан танишди. Жумладан, туман марказидаги бўш турган бино ўрнида кўп қаватли тураржой ҳамда хизмат кўрсатиш комплекси барпо этиш, тиббиёт бирлашмаси ҳудудида давлат- хусусий шерикчилик асосида тиббий хизматларни ташкил этиш ҳамда қишлоқ хўжалиги соҳасида ҳамкорлик қилиш бўйича фикрлашилди.

–Қувайтлик инвесторлар туман тиббиёт бирлашмасига ҳам ташриф буюриб, аҳолининг саломатлигини сақлаш борасида амалга оширилаётган ишларимиз билан яқиндан танишиб, келгусида касалликларни эрта босқичларда аниқлаш бўйича давлат- хусусий шериклик асосида замонавий, тиббий лаборатория хизматини йўлга қуйиш юзасидан ўз таклифларини берди,–дейди туман тиббиёт бирлашмаси бош шифокори Акромжон Азизқулов.–Ўйлаб қаралганда, ушбу хизмат боёвутликлар учун керак. Бу эса, тиббий хизмат кўрсатишнинг янада ривожланишига, 100 дан ортиқ касалликка эрта босқичларда ташхис қуйиш имконини беради.

Боёвутга қувайтлик инвесторларининг ташрифи келгусида хорижий инвесторлар иштирокидаги корхона ва ташкилотларни ишга туширишга, экспортга йўналтирилаётган маҳсулотлар турининг кўпайишига йўл очади, албатта.