Буни вилоят ҳудудларида истиқомат қилувчи ногиронлиги бўлган шахсларни ҳар томонлама қўллаб-қувватлаш мақсадида ўтказилаётган қатор тадбирлар мисолида ҳам кўриш мумкин.

Вилоят ҳокими вазифасини бажарувчи Акмалжон Махмудалиев ҳамда вилоят сектор раҳбарлари турли маҳаллаларда бўлиб, ногиронлиги бўлган фуқаролар ҳолидан хабар олди.

- Мақсадимиз ногиронлиги бўлган фуқароларни моддий-маънавий қўллаб-қувватлаш, кўнгилларини обод қилиш, - дейди вилоят раҳбари. – Ўзгалар парваришига муҳтож кишилар озгина эътибор ва рағбатнинг қадрини яхши билади. Кимнингдир эшикдан кириб келишини, ҳолидан хабар олишини интиқлик билан кутади.

Йўқловлар чоғида бир неча турдаги озиқ-овқат маҳсулотлари, ногиронлик аравачалари тарқатилди.

– Эътибордан кўнглим тоғдай кўтарилди, – дейди Гулистон шаҳри "Буюк келажак" маҳалласида яшовчи, 1-гуруҳ ногирони Ҳикматой Маматова. – Мен каби кўнгли ўксик инсонларга кўрсатилаётган эътибор, эҳтиром учун Юртбошимизга, барча яхши инсонларга раҳмат.

Меҳр-саховатнинг катта-кичиги бўлмайди, у доимо қалби ўксик, меҳрга муҳтож кишилар дилига нур олиб киради. Яхшилик кўрганларнинг эътибор, меҳр-мурувватдан кўнгиллари шод бўлади. Зеро, эъзоз ва эътибор, бир калима ширин сўз ҳеч қачон эсдан чиқмайди.

Бу каби хайрли ишлар туман ва шаҳарларда ҳам давом этмоқда.