Ishchi guruh Boyovut tumanida bunyod etilgan Adliya bo‘limi binosida yaratilgan sharoitlar bilan tanishdi

Respublika ishchi guruhi tarkibida Bosh prokuror o‘rinbosari-Harbiy prokuror Shuxrat Uzakov va Ichki ishlar vazirining o‘rinbosari Azizbek Ikramov tomonidan Sirdaryo viloyatida jinoyatchilikni barvaqt oldini olish, huquqbuzarliklarga qarshi kurashish, tuman va shahar sektorlar faoliyati, davlat dasturlarining ijrosini taʼminlash, shuningdek viloyatda savdo-iqtisodiy, madaniy-maʼrifiy, taʼlim, sog‘liqni saqlash yo‘nalishlarida olib borilayotgan ishlar natijadorligi o‘rganilmoqda.

Davlatimiz rahbarining “Fuqarolarning huquq va erkinliklarini taʼminlash hamda huquqiy xizmat ko‘rsatishda adliya organlari va muassasalari faoliyati samaradorligini yana-da oshirish chora-tadbirlari to‘g‘risida”gi Farmoniga asosan adliya tizimi ixchamlashtirildi. Farmonga asosan tumandagi davlat xizmatlari markazlari, FHDYO organlari va yuridik xizmat ko‘rsatish markazlari tuman adliya bo‘limlari bilan birlashtirilib yagona Adliya bo‘limlariga aylantirildi va ular bitta binoda faoliyat yuritadi.

Ishchi guruh Boyovut tumanida yangi bunyod etilgan Adliya bo‘limi binosiga tashrif buyurdi hamda adliya, FHDY, DXM va yuridik xizmat ko‘rsatish markazlari faoliyati va bo‘limda fuqarolarga yaratilgan qulayliklar bilan tanishishdi.

Shundan so‘ng adliya organlari tomonidan joriy yilning 6 oyi davomida amalga oshirilgan ishlar, xususan, targ‘ibot tadbirlari, davlat xizmatlari va huquqiy xizmatlar ko‘rsatilishi yuzasidan Adliya boshqarmasi boshlig‘i Salohiddin Sattarovning axboroti tinglandi.

Adliya organlari tomonidan amalga oshirilgan ishlar muhokama qilinib, tegishli taklif va tavsiyalar berildi.